Breytingar á lögum um fjarskiptasjóð
Þá er í lögunum kveðið á um að fjarskiptasjóður verði fjármagnaður af tekjum sem til eru komnar vegna úthlutana á tíðnum vegna fjarskipta, sem kveðið er á um í fjarskiptalögum nr. 81/2003. Auk þess er stjórnarmönnum fækkað úr fimm í þrjá í samræmi við minnkað umfang starfsemi sjóðsins.
Fjarskiptasjóður hefur verið starfræktur frá árinu 2005. Sjóðurinn var stofnaður í kjölfarið á sölu á eignarhlut ríkissjóðs í Landssíma Íslands, en hluti af söluandvirðinu var látinn renna í sjóðinn til uppbyggingar á sviði fjarskiptamála. Meginhlutverk sjóðsins er að stuðla að uppbyggingu á sviði fjarskiptamála á grundvelli fjarskiptaáætlunar hverju sinni, með því að úthluta fjármagni til verkefna sem miða að uppbyggingu stofnkerfa fjarskipta, verkefna sem stuðla að öryggi og samkeppnishæfni þjóðfélagsins á sviði fjarskipta og annarra verkefna sem kveðið er á um í fjarskiptaáætlun, og ætla má að ekki verði ráðist í á markaðsforsendum. Það á fyrst og fremst við um uppbyggingu á strjálbýlli svæðum landsins, en að jafnaði er til staðar virk samkeppni á fjarskiptamarkaði á þéttbýlli svæðum.
Til stendur að leggja fyrir Alþingi þingsályktunartillögu um nýja fjarskiptaáætlun sem ætlað er að gilda til næstu tólf ára. Mikilvægt er að tryggja áframhaldandi framþróun á sviði fjarskipta og styðja við uppbyggingu þar sem slíkt er ekki mögulegt á markaðslegum forsendum.